仲有半個鐘都無就正式踏入2014年，我諗大家facebook都充斥住打卡，咩新年願望。
而我都例牌都打下過去一年回顧，為回憶留下一點歷史印記。
通常踏入新一年，好多人都會比一個藉口，一個理由比自己去發奮，比自己去重新開始，好似托利斯係車路士梅足咁耐，突然剷左青，嗰刻我即時諗到:『丫!佢發奮啦!』，又或者突然執下自己間房，清左好多垃圾出黎，又或者為自己來年定下一啲目標，以一個興趣又期待嘅心情迎接新一年。
不過做左24年人嘅我都深知道往往以上嘅野都係三分鐘熱度，自己望下2012,2011,2010除夕所打嘅回顧，幾乎篇篇都一樣，所定嘅目標幾乎無樣做得到......
2012年時，期待2013年可以開開心心，快快樂樂。點知新一年仲慘過食屎。上半年仲讀緊大學最後一個學期，日日行屍走肉，完全唔知自己做咩，但殺到埋身嘅工作量加上同朋友之間為左無謂嘅Group project/presentation而令關係受損同令人消化唔到，繁忙嘅工作量令自己有時透唔到氣，但無從呻訴，唯有硬食，最後大學係一片唔知發生緊咩事嘅狀態下就完結左，咩係青春咩係燃燒最後校園團火通通熜哂。
大學畢業，進入左搵工階段，日日係屋企上網睇有咩工，之後寄CV，日覆日，面試一次又一次失敗，心情從來都無好過。有時出去聚會，為左氣氛，為左朋友，我都不自覺地自high，做下on9仔，攪下Gag，總之令到身邊所有人都開心咁笑就得，但關門離開後，卻是另一個人，明明自己唔開心都要拎住面具對人笑......久而久之，都唔知自己個真性情收埋係邊同埋幾時先肯見人。
暑期第一次出外旅行，第一次坐飛機，感覺咩都好新奇，雖然只係小小嘅台灣，但都令我大開眼界，亦感謝好友肯陪我一齊去同做埋我導遊。
書展，唔知邊個講過，人一生至少有7分鐘係出名定係咩，我諗書展簽名會個日我都唔會忘記一大班好友，預科同學，中學同學，大學同學都黎齊支持我，最緊要以為無讀者黎嘅我，竟然見到過百人為我排隊，特別有一對小情侶，怕怕羞羞咁走埋黎簽名，之後男方拉住女方隻手行埋黎，之後對我講句:『HI!孔明大哥!你之前寄過卡比我地架!』唔知點解嗰刻感覺好特別，係到祝福你地依對小情侶順順利利，開開心心。
踏入九月，正式上班，初出茅廬嘅新仔，做任何事都戰戰兢兢，壓力亦慢慢湧現，你唔可以再係讀書時期咁，唔鐘意就唔做，或者遲交，所有野你都要面對，所有野都要默默咁忍受，真係用個捱字黎形容。
壓力都近乎爆煲，但唔可以同人講，因為講左都無人會明，身體都漸漸差左好多，成日都病，攪到個人都驚左病，真係得閒死唔得閒病，點病你都要做野，依個就係打工仔生活。
日子一長，都開始習慣左新嘅生活模式，亦都進入機械式軌道，返工→放工→上網食飯沖涼訓覺→再返工→不斷loop，人生就係咁。
唯有值得欣慰係一筆可觀嘅收入，但去到月尾基本上已經洗哂所有錢，不過從來都唔知自己洗左去邊，仲話學人儲錢......?
11月，終於完左自己人生其中一個心願，就係帶屋企人黎見證我畢業，同埋帶佢地參觀大學，個日見到老豆將佢衣櫃長期封印嘅西裝拎出黎著，阿媽又緊張自己衣著，家姐去等花店開鋪買花，接近消失左嘅阿哥都出現，為嘅都係同我影相見證我畢業，個日我好開心。晚上，坐係大學樓梯，望住啲人慢慢散去，就覺得份外心酸，拍一拍自己之後就起身對自己講:『畢業啦，依個地方已經唔再屬於你。』
12月，已經唔想講了，有苦自己知，心痛自己痛，遺留下落嘅「蘇周屎」自己去處理返同交代返。假期流流長，理應在家處理好工作，來緊一月將會有好多大型Project由我負責，我睇唔透上司點解咁睇得起我依個新仔，不過依一刻......真係無哂心機再做野，只係想摺埋自己算。
過去一年都係灰灰沉沉，都唔求咩新一年開開心心，都唔靈ga! 我只係但求新一年唔洗捱得咁苦就夠。
不過都希望讀者們唔好學咁我，應該積極啲面對挑戰同困難，收到你地好多PM要收聖誕卡，好多內容都係充滿煩惱，有時侯睇到你地故事都為你地擔憂，大家都離不開一隻字-「情」，希望新一年你地脫苦海，唔洗再比人玩，開開心心啦!
Search